Hvað kostar að endurnýja baðherbergi? (Og hvernig þú átt að hugsa um kostnaðinn)

Baðherbergið er eitt mikilvægasta rými heimilisins. Það er notað á hverjum degi og hefur mikil áhrif á þægindi og fasteignaverð. Oft eru fleiri en eitt baðherbergi í íbúðarhúsnæði og það er kostnaðarsamt að endurnýja þau. Því er eðlilegt að spyrja: „Hvað kostar að endurnýja baðherbergi?"

Fjölmargir þættir hafa áhrif á kostnaðinn, s.s. ástand veggja og vatns- og frárennslislagna, efnisval og hversu miklar breytingar á að gera. Það er því mikilvægt að undirbúa allt nákvæmlega fyrirfram og sníða verkefnið að þörfum og fjárhag viðkomandi.

1. Undirbúningur og skipulag

Skipulag og undirbúningur er það fyrsta sem þarf að gera. Ekki byrja að rífa niður gamlar flísar eða fjarlægja hreinlætistæki og innréttingar fyrr en allt hefur verið skipulagt, teiknað upp og kostnaður liggur fyrir.

Hugleiddu eftirfarandi:

• Notkun baðherbergisins. Er það daglegt fjölskyldurými eða lítið gestabaðherbergi?
• Á að breyta staðsetningu og gerð bað- og hreinlætistækja? Að færa salerni eða sturtu / baðkar hefur áhrif á lagnakerfið og er kostnaðarsamt. Lagnabreytingar kunna einnig að vera háðar samþykki byggingaryfirvalda.
• Viltu lúxus eða einfalt og hagkvæmt? Efnisval hefur stór áhrif á heildarverðið.

Nauðsynlegt er að ákvarðanir séu skýrar og teknar tímanlega og að verkið sé skipulagt í smáatriðum fyrirfram. Þetta leggur grunninn að velheppnuðu verki.

2. Vatnslagnir og rafmagn

Stór hluti kostnaðarins getur legið í því sem er hulið inni í veggjum eða í gólfi; vatns- og frárennslislögnum og rafmagni.

Hér er ekkert rúm fyrir mistök við efnival eða framkvæmd. Mundu að baðherbergi eru votrými þar sem notkun vatns er mikil og gufa og raki eru eðlilegur hluti notkunar.

Vatns- og frárennslislagnir:

• Í gömlum rýmum eða ef verið er að færa bað- og hreinlætistæki, er skynsamlegt að endurnýja vatns- og frárennslisrör með nýjum og endingargóðum lögnum.
• Allt þarf að vera vatnsþolið og samkvæmt byggingareglugerð til að minnka líkur á tjóni.

Rafmagn:

• Mikilvægt er að endurnýja raflagnir, rofa og tengla ef um eldri baðherbergi er að ræða og gæta þess að allt sé jarðtengt í samræmi við byggingarreglugerð.
• Stundum þarf að breyta eða endurnýja rafmagnstöflu til að mæta nútíma öryggiskröfum.

3. Tæki og búnaður

Þegar undirbúningi er lokið byrjar sá hluti verksins sem flestir tengja við sjálfa framkvæmdina; þ.e. að fjarlægja gólf- og veggflísar, innréttingar og baðtæki.

Hér er það helsta sem þarf að huga að:

• Salerni: Gólftengt eða vegghengt? Vegghengt salerni er dýrara í uppsetningu en mun stílhreinna og auðveldara að þrífa.
• Sturta eða baðkar: Walk-in sturtur eru vinsælar fyrir nútímalegt útlit, en baðkar hentar fjölskyldum og börnum eða þeim sem vilja meiri lúxus.
• Vaskur og blöndunartæki: Stíll, stærð og uppsetning hafa áhrif á notagildi og útlit.
• Aukabúnaður: Handklæðaofnar, speglar með lýsingu og hitagólf auka þægindi en einnig kostnað.

Til umhugsunar: Góð gæði kosta meira í upphafi en geta sparað pening á löngum tíma með minna viðhaldi og lengri endingu.

4. Innréttingar

Innréttingar eru mikilvægur þáttur í góðri nýtingu baðherbergisins. Gott skápa- og hillupláss auðveldar að halda baðherberginu snyrtilegu.

Atriði til umhugsunar:

• Efnisval: Veldu raka- og hitaþolnar innréttingar.
• Hönnun: Innbyggðir skápar og hillur auka nýtingu plássins og halda rýminu snyrtilegu.
• Sérsmíði eða tilbúið: Sérsmíðaðar lausnir passa betur en eru dýrari. Tilbúnar innréttingar eru ódýrari og hraðari í uppsetningu.

Ráð: Hugsaðu um notagildi – hvar á að geyma handklæði, snyrtivörur og hreinsiefni?

5. Flísar, gólf og frágangur

Flísar hafa afgerandi áhrif á útlit baðherbergisins og eru oft það sem fólk tekur fyrst eftir. En vandasamt er að ákveða hvernig flísalagt er; hvar á að byrja, hvernig á að skera flísar við inn- og úthorn, inni í baðklefum, kringum glugga og hurðagöt.

Undirbúningur:

• Gólfhalli þarf að vera réttur og liggja að niðurföllum.
• Flísalagning í votrýmum skal vera vatnsheld samkvæmt byggingareglugerð.
• Huga þarf að einangrun og gólfhitun áður en flísar eru lagðar.

Efnisval:

• Gólf- og veggflísar koma í öllum stærðum og verðflokkum. Góð ending og auðveld þrif eru mikilvægari en útlitið eitt og sér.
• Huga þarf að stærð flatarins áður en flísar eru valdar og samspili flísa á gólfi og veggjum.
• Ganga þarf vel frá fúgum – einkum í votrýmum – vegna langvarandi vatnsálags.

Að leggja flísar er nákvæmnisvinna. Smávægileg mistök geta verið afdrifarík. Ráðlagt er að fá fagmann eða vanan flísamann til að sjá um þennan hluta.

6. Hönnun og verkstjórn

Endurnýjun baðherbergis er stórt og kostnaðarsamt verkefni og kallar á samhæfingu mismunandi iðnaðargreina, s.s. pípara, rafvirkja og smiða.

• Gerið allt í réttri röð og á réttum tíma.
• Skipuleggið vinnu iðnaðarmanna miðað við framgang verksins.
• Góðir iðnaðarmenn eru umsetnir og hafa litla þolinmæði fyrir skipulagsleysi.

Góð verkstjórn tryggir að verkið gangi betur, áætlanir standist og meiri líkur séu á að verkefnið haldist innan fjárhagsáætlunar.

Til umhugsunar: Það borgar sig að hafa einn aðila sem ber ábyrgð á framkvæmdinni frá byrjun til enda.

Ráð frá fagmanni

Við hjá Vættum sérhæfum okkur í endurbótum og viðhaldi og vitum að hver fermetri á baðherbergi skiptir máli. Með því að fá faglega ráðgjöf í upphafi geturðu:

• Forðast kostnaðarsöm mistök og óvænt útgjöld.
• Nýtt peningana betur og sett í forgang það sem skiptir mestu máli.
• Fengið baðherbergi sem er bæði smekklegt, hagnýtt og endingargott.

Ef þú ert að hugsa um að endurnýja baðherbergið þitt – hafðu samband við okkur áður en þú byrjar. Við komum á staðinn, metum ástandið og hjálpum þér að skipuleggja verkefnið frá A til Ö.